કશુંક

પાંખાળું પૂર એક જોયું,
………. હો રાજ ! મેં તો પાંખાળું પૂર એક જોયું.
સમણાંને ઢોલિયાંમાં ખોયું
………. હો રાજ ! મેં તો સમણાંને ઢોલિયામાં ખોયું.

અલબેલો રંગ કોઈ આવી મળીને
………. મારા રુદિયામાં પીછાં ઉમેરે,
અલ્લડ આ ઓરતાને આઘા ઠેલું
………. ને તોય આવી – આવીને એ જ ઠેરે
આજ હૈયું હરખનું રે ઘોયું !
………. હો રાજ ! મેં તો પાંખાળું પૂર એક જોયું.

વીણી-ચૂણીને માંડ ભેળા કર્યા છે
………. મેં તો મારા તે કેટલાય હિસ્સા,
કૂંપળને કાનમાં જઈને કે’વા છે
………. મારે મારા આ વરસાદી કિસ્સા
માંહ્ય મ્હોર્યું છે કોઈ વ્હાલસોયું
………. હો રાજ ! મેં તો પાંખાળું પૂર એક જોયું.

વાંસતી સપનાંને અપલક
………. ઉજાગરાની વાતો તે કેટલીક કરવી ?
સમદરની સેલ્લારા કરતી આ
………. લેર્યુંને શબ્દોમાં કેટલીક ભરવી ?
તો ય હૈયાંને વાણીમાં પ્રોયું
………. હો રાજ ! મેં તો પાંખાળું પૂર એક જોયું.

– ગઢવી સુરેશ ‘વરસાદ’