મહા પ્રશ્ન

‘ઈડિયટ બોક્સ !’
ખૂબ ખૂબ આભાર તારો !
આજ સુધી અમે અબુધ, અજ્ઞાની,
અટવાયા કરતા હતા અંધારામાં
ખંજવાળ્યા કરતા હતા માથું
અમારી અવનતિ વિશે.
પણ તેં ખૂબ સહજતાથી
એ હકીકત પર
રંગદર્શી રૂપદર્શી
પ્રકાશ ફેંક્યો કે
આ મહાન દેશનો મહા પ્રશ્ન
ભૂખ અને બેકારી નહીં
આરોગ્ય… શિક્ષણ… રહેઠાણ… નહીં
અરે, નોકરીમાં કાનૂનરક્ષિત
‘કોન્ટ્રાક્ટ પ્રથા’નો ય નહીં
બલ્કે, ‘ડેન્ડ્રફ’નો છે.
એના નિવારણ માટે
રામબાણ ‘શેમ્પુ’ વાપરો….
અને માથું ખંજવાળ્યા વિના સુખેથી
ભવસાગર તરો….!

– કિસન સોસા