પ્રેમની પથારીએ પોઢી

પ્રેમની પથારીએ પોઢી
આઠે પહોર સખી સપનાં રે આવે
પ્રેમની પથારીએ પોઢી
બંધ નયનોમાં રમાડી રુપલી ચાંદની
પૂનમની ભરતી પખાળી
ગગને ઘૂમું હું સ્વપ્ન પરી થઈ
તારાએ દિલડાં શણગારી
પહાડોની કંદરામાં પાડું રે પડઘા
મોરને વનરાજી એ નચાવું
સખી આજ હું પ્રેમની પથારીએ પોઢી
ગીત સંગીતની છેડી સરગમ સૂરાવલી
વાદળની ડુંગરીએ નાચી
પુષ્પ પતંગિયું થઈ ઉપવને ભમતી
સુગંધી વાયરે શરમાણી
સખી આજ હું પ્રેમની પથારીએ પોઢી
સ્વપ્ન મિલને સ્નેહ સરવાણીઓ ઝીલી
મીઠી નીંદરું ભાવે માણી
હરખ્યા અંતર કરતા ગાલ ગુલાબી
હોળીના રંગે રંગાણી
સખી આજ હું પ્રેમની પથારીએ પોઢી

- રમેશ પટેલ(આકાશદીપ)